Жанкүйерлер жаттықтырушыны сабап кетті

«Черноморец» (Одесса, Украйна) клубының жаттықтырушысы, кезінде Қазақстан жасөспірімдер мен жастар құрамасын баптаған  Константин Фроловты, жанкүйерлер таяққа жығып кетіпті, деп хабарлайды SportX.kz. 

Оқиға  Украйна чемпионатындағы бітіспес қарсыластар «Полтава» мен»Черноморец» арасындағы матчтан кейін орын алған. Полтавада өткен бәсекеде одессалық футболшылар  0:3 есебімен алаң иелерінен жеңіліп қалады. Ал өз алаңындағы  алғашқы матчта 1:0 есебімен Константин Фроловтың командасы жеңіске жеткен екен.  Екі ойын нәтижесіне көңілдері толмаған  қаны қызу футбол жанкүйерлері, алдарына келіп кешірім сұрамақ болған  бас жаттықтырушыны сөзге келмей басынан бірнеше рет соққы жасаған.

Соның салдарынан көзі көгеріп, гематома пайда болған. Таяққа жығылған Константин Фролов сол сәтте-ақ кідірместен оқиға орнынан асығыс кетіп қалған. Естеріңізге сала кетейік, Фролов 2012-2014 жылдары Қазақстан футбол федерациясының спорт жөніндегі директоры Анатолий Юрьевичтің шақыруымен  еліміздің жастар және жасөспірімдер құрама командасының аға жаттықтырушысы қызметін атқарады.

Осы жылдың қаңтар айынан бері   одессалық клубты баптап келеді.