Олимпиадалық ойындардың сегіз дүркін чемпионы жамайкалық желаяқ Усэин Болт, аустралиялық футбол клубынан шақырту алды, деп хабарлайды SportX.kz.
31-жастағы Усэин Болтты «Сентрал Кост Маринерс» клубы шақырып отыр. Оның шақыру алғаны келген бойда жасыл алаңға шығады деген сөз емес. Клуб қожайындары экс-чемпионның аяқ-алысын, доп тебу қабілетін байқап көрмек. «Сентрал Кост Маринерс» Аустралия чемпионатының А-лигасында өнер көрсететін клубтардың бірі. Госфорд қаласының намысын жыртатын команданың аяқ-алысы жаман емес. 2004-жылы құрылған клуб сол маусымда плей-офф кезеңіне дейін жетіп, шешуші матчта «Сидней» клубына жол беріпті.
Алты аптаға жоспарланған сынақ-байқаудан сүрінбей өтсе, жамайкалық футболшы клубпен бір маусымға арналған келісім шартқа отырады. Екі жақ келісім-шартты егжей-тегжейлі пысықтап та қойыпты. Бәрі ойдағыдай шешіліп жатса, болашақ футболшыға бекітілген жалақының 75 пайызын клуб, ал қалғанын Аустралия футбол одағы төлейді.