Қазақстандық сарбаз бразилиялықпен кездесуден бас тартты

Аралас жекпе-жектен аты шығып жүрген павлодарлық Фаниль Рафиков (13 – 1) бразилиялық Фелипе Фроесқа(15-3) қарсы бәсекеден бас тартты, деп хабарлайды SportX.kz.

Екі сарбаз арасындағы жекпе-жек 18-тамыз күні Мәскеудегі «Россия» Мемлекеттік орталық концерт залында өтетін болған. Осы кездесуде жеңіске жеткені аталмыш нұсқа бойынша титулдық жекпе-жектен бірден-бір үміткер болып шыға келетін. Бірақ WFCA версиясының 50 жылдық мерейтойы аясында өткізілген турнир қазақстандық сарбазсыз өтетін болды. Өзінің әлеуметтік желідегі парақшасында денсаулығы сыр бергенін жазған Фаниль, жекпе-жектен бас тартқаны үшін жанкүйерлерінен кешірім өтінген.

Ұйымдастырушылар Фанильдің орнына тез арада басқа сарбаз тауып үлгеріпті. Сонымен 18-тамыз күні бразилиялық Фелипе Фроесқа, аралас жекпе-жектен әлем және Ресей чемпионы Құрбан Тайгибаров (7-1) қарсы тұрады.