«Қазақстан Барысы-2018» турнирінде Алматының намысын жыртатын балуандар белгілі

Қазақ күресінен еліміздегі ең үлкен мегаполистің чемпионы атағын Түрксіб ауданының түйе балуаны Дәурен Нұралинов жеңіп алды.Шындығында да Алматыдай ірі шаһардың «Барысы» деген  құрметке ие болу, кез келген балуан үшін үлкен мәртебе.

Дәстүрлі «Қазақстан Барысы» турнирінің деңгейі мен мәртебесі жыл санап артып келеді. Алматыдағы кезекті жарыс осы сөзімізге жақсы дәлел. Өйткені бас бәйге жолындағы тартысқа толы  белдесулер  көрерменін жайбарақат қалдырған жоқ. Биылғы турнирдің ақтық сынында  салмағы 132 келі тартатын  былтырғы чемпион, Медеу ауданының өкілі Руслан  Әбдіразақов пен  Түрксіб ауданының  апайтөс балуаны Дәурен Нұралинов(122 келі) кездесті.

Тартысты өткен боз кілемдегі ақтық белдесуде, талай додаларда оза шауып бәйге алып жүрген тәжірибелі балуан Әбдіразақовтан  мерейін асырған  Нұралинов «Алматы Барысы-2018»  турнирнің бас бәйгесін иеленді. Жүлделі үшінші орын үшін болған бәсекеде түрксібтік Жайдар Сайлаубаев жеңіске жетті. Ол Алатау ауданының белді балуаны Елдар Насиевтен алда болды.

Турнир жеңіпазына алтын  белбеуге қоса  темір  тұлпардың кілті  ал, екінші орынға табан  тіреген балуанға үш мың көлеміндегі ақшалай сыйлық пен күміс белбеу  табысталды. Енді олар «Қазақстан Барысы-2018» турнирінің ақтық додасында Алматы қаласының намысын жыртатын болады.