«Қазақстан барысы-2018»: Шынкеев ешкімді шыдатпады
Ержан Шынкеев- қазақ күресінен республикалық «Қазақстан барысы» турнирінің жеңімпазы атанды, деп хабарлайды SportX.
Қазақ күресін дамыту, насихаттау және әлемге танытуды мақсат тұтқан «Қазақстан барысы» жобасы, жылдан жылға халық арасында үлкен мәртебеге ие болып келеді. Күрес — қазақтың қанына біткен өнер. Тамыры тереңге кететін ұлттық күресіміз осы жобаның аясында ілгері басып, қазақ күресінен Азия,Әлем, Еуропа және Еуразия сияқты халықаралық деңгейдегі байрақты додалар өткізіле бастады. Олардың арасында үш кезеңнен тұратын республикалық «Қазақстан барысы»турнирінің орны бөлек. Олай дейтінміз жарыста топ жарған балуан- иісі қазақтың батырына айналады. «Қазақстан барысы» деген атақтың мәртбесі, олимпиадалық ойындардың чемпионы деген атақпен пара-пар. Керек десеңіз одан да асып түседі. Өйткені «Қазақстан барысы» деген ұғымның өзі — ірілікті, ұлылықты, ұлттық құндылықты, тектілікті, қазаққа тән қасиет пен мінезді және батырлықты жырлап тұрғандай. Қазақ күресінің жас ұрпақты тәрбиелеуде де маңызы зор.
«Қазақстан барысы- 2018»- додасы жылдағыдан да қызықты өтті. Қазақстан Республикасы Тұңғыш Президентінің жүлдесі мен Астана қаласының 20 жылдығына орай ұйымдастырылған биылғы турнирде ұзын-саны отыз жеті балуан күш сынасты.
Осымен сегізінші рет өткізілген мәртебелі доданың ақтық сынында қарғандылық Ержан Шынкеев пен «Әскер барысы» Ерасыл Қажыбаев белдесті. Ерасыл ширек финалда турнирдің былтырғы жеңімпазы Еламан Ерғалиевті, ал жартылай сында түркістандық Мұзаппровтың алдын орап кеткен еді. Мұзаппаровпен өткен белдесуде салмағы 151 келі тартатын Ерасыл Қажыбаев, оң йығынан жарақат алып қалды. Бірақ соңына дейін күресіп, жеңісті өз пайдасына асырып кетті.
Өз кезегінде Ержан Шынкеев жартылай финалдағы тартысты бәсекеде өте тәжірибелі және кезінде «Қазақстан барысы» атанған шығыс қазақстандық балуан Айбек Нұғымаровтан алда болды. Не керек жол-жөнекей небір мықтыларды сүріндірген екі батыр, ақтық сында кездесті. Шынкеев— техникалық арсеналы бай һәм нағыз тіс қаққан шебер. Республикалық сайысқа осымен бесінші рет жолы түскен Ержан, 2013 жылы күміс жүлдегер атанған еді. Кезегін көп күткен балуан боз кілемге тас түйін болып шықты. Ә дегеннен бүк ұпайын алып оны жамбас ұпайына айналдыра алды. Белдесу барысында оң йығын қайта-қайта сипалаумен болған Ерасыл, ашылып күресе алмады. Нәтижесінде ұпай санымен жеңіске жеткен қарағандылық балуан Ержан Шынкеев, бесінші әрекеттен «Қазақстан барысы» деген құрметті атаққа ие болды.
Чепмпионға алтын белбеу мен алтыннан құйылған «тайтұяқ» және 25 млн теңге сыйақы табыс етілді.Үшінші орын үшін өткен бәсекеде Ерсұлтан Мұзаппаровты ұтқан Айбек Нұғымаров ұздік шықты. Күміс жүлде иесі атанған Қажыбаевқа 5,5 млн, ал тұғырдың үшінші сатысына көтерілген Нұғымаровқа 1,8 млн теңге табысталды.
