«Қайрат»футболшылары «Астананы» қуып жетуді көздейді
ҚР премьер лигасының 16- турында Алматының «Қайраты» Қызылордада жергілікті «Қайсардан» басым түсті. Шиеленісті өткен ойын 1:2 есебімен қонақтардың пайдасына шешілді, деп хабарлайды SportX.
Кездесудің бірінші бөлігінде екі жақтың қорғаныс шебі сыр бере қоймады. Екінші таймды ширақ бастаған алаң иелері көп кешікпей есеп ашып алға шықты. Бұл голға «Қайсардың» қақпашысы ұйытқы болды. Оның алысқа лақтырған добын іліп ала жөнелген Мақсат Байжанов, алдынан шыққан қорғаушыны алдап өткен бойы ала допты қақпаға дәл бағыттады. Алаң иелерінің қуанышы көп ұзамай-ақ су сепкендей басылды. Араға бес минут салып, өз мүмкіндігін бос жібермеген Исаэль таразы басын теңестіріп үлгерді. Ал, бүгінгі ойынға нүкте қойған және «Қайратқа» ауадай қажет үш ұпай әкелген голды Бауыржан Исламхан соқты.
Осы жеңістен кейін 38 ұпай еншілеген алматылықтар, көш басындағы «Астанаға» бір табан жақындай түсті. Екі клуб арасындағы ұпай айырмашылығы әзірге сегіз ұпайды құрайды.
Осы турда «Шахтерді» қабылдаған «Ақтөбе» қонақтардың қақпасына жауапсыз қос доп тоғытты. Кездесудің 6- минутында алаң иелерін алға шығарған Маркос Пиззелли, екінші таймның басында осы матчтағы екінші голын соқты. Екінші тайм белортасына жеткенде ойын ережесін бұзғаны үшін Александр Симчевич ойыннан қуылып, алаң иелері матчты он футболшымен аяқтауға мәжбүр болды. Дегенмен олар таблодағы есепті сақтап қалды. Сонымен қатарынан үш матчта жолы болған «Ақтөбе», турнир кестесінде алтыншы орынға көтерілді.
Қалған ойындардың нәтижесі мынадай:
«Атырау» — «Қызылжар»- 0:0, «Ертіс» — «Жетісу» -0:2, «Тобыл» — «Ақжайық»- 3:1 және «Астана» — «Ордабасы»- 5:3.
