Мадиярдың боксы өзгелерге ұқсамайды

Кәсіпқой бокста жеңіліп көрмеген қазақтың тағы бір батыры Мадияр Ашкеев (9-0, 5 КО) 4-тамыз күні кезекті жекпе-жегін өткізеді. Жамбыл спорт мектебінің өкілі Атлантик-Сити шаршы алаңында мексикалық Фернандо Каркамомен жұдырықтасады, деп хабарлайды SportX.kz .

Атлантик-Ситидегі бокс кешінің орталық матчында ресейлік Сергей Ковалев (32-2-1, 28 КО) пен колумбиялық Элейдер Альварес (23-0, 11 КО) кездеседі. 

Жалпы Мадиярдың кәсіпқой бокстағы аяқ-алысы жайлы көп айтылып немесе жазылып жүрген жоқ. Бірақ әлі кеш емес. Мадияр әлі-ақ отандық бұхаралық ақпарат құралдары тарапынан өзіне лайықты бағасын алады деп сенеміз. Оның рингте өзін ұстауы және бокстасу мәнері басқалардан өзгеше. Өте ұстамды һәм қарапайым боксшы. Мадияр шегініп жүріп ұрыс салатын шеберлердің қатарына жатпайды. Керісінше,қарсыласын өз ығына көндіріп,  сәті түскенде ауыр соққылардың астына алатын өз күшіне сенімді шебер. Оның шаршы алаңда еркін қимылдай жүріп, бүйірден жасайтын соққыларын айтсаңызшы. Айта берсек, Мадиярдың жүріс-тұрысы кәсіпқой бокста жүрген басқа боксшыларымызға мүлдем ұқсамайды.

Бүгінгі күні кәсіпқой бокста белгілі бір дәрежеге көтерілу өте қиын. Мың жерден талантты бол, бірақ амалын таппасаң далада қаласың. Өйткені кәсіпқой бокс бұрыннан-ақ  бизнес көзі болып келген. Бүгінгі күні ел-жұртты баурап алатын мерекелік шоуға айналып отыр. Ал, сол шоуды жасайтын іскерлерге талантты боксшы аздық етеді, оларға үлкен орта керек. Сол ортаны қалыптастыру үшін олар қаржыны аямайды. Осылайша керек боксшыларын мейлінше жарнамалау арқылы  бағасын арттырып, тек содан кейін бокс кешін жариялайды. Себебі бокс кешінен түсетін түсім, жұмсалған шығынды жапқаны былай тұрсын, одан асып төгілуі қажет.

Кәсіпқой бокс әлемінде таланттардың жолын ашып жүрген менеджерлер жетеді. Соның бірі — Эгис Климас. Климастың біздің Мадиярға ерекше көңіл бөлуі бекер емес. Меніңше Ашкеевке қатысты өздерінің бір есебі бар сияқты. Өйткені Ашкеевтің жұдырықтасу мәнері, көпшілікке ұнайтын өзіндік ритмімен ерекшеленеді. Ол мәнер- мексикалық, еуропалық, азиялық және ең бастысы қазақ боксы мектептерінің синетезінен құралғандай. Мадияр бұл күндері Окснардтағы (Калифорния штаты) Boxing Laboratory залында Василий Ломаченко, Александр Усик, Сергей Ковалев және Александр Гвоздик сынды боксшылармен бірге жаттығуда.