Головкиннен қалған белбеуді Джейкобс жеңіп алды (ВИДЕО)

Украйналық Сергей Деревянченконы ұтқан америкалық боксшы Дэниэл Джейкобс орта салмақ бойынша IBF нұсқасының жаңа чемпионы атанды, деп хабарлайды SportX.kz

Осы жаз IBF нұсқасының орта салмақ дәрежесіндегі чемпиондық атағын Геннадий Головкин мен Сергей Деревянченко сарапқа салатын болған. Бірақ қазақстандық боксшы кездесуден бас тартқаны үшін бокс ұйымы жерлесімізден чемпиондық белбеуді алып қойған болатын. Не керек ұзақ уақыт иесіз қалған белбеудің иегері кеше түнде белгілі болды.

Нью-Иорктегі Madison Square Garden аренаның кіші залында өткен бокс кешінің орталық матчында Дэниэл Джейкобс пен Сергей Деревянченко кездесті. Боксшылар 12-раундқа жоспарланған бәсекенің басынан аяғына дейін арпалысып, тек төрешілер шешімімен жеңіс америкалық Джейкобстың қанжығасына байланды. Жекпе-жектің бірінші раундында нокдаун орын алып, төреші украйналық боксшыға қатысты есеп ашқанын да айта кетейік.

Өкінішке орай кезінде «Астана арландары» сапында өнер көрсеткен Сергей Деревянченкоға чемпиондық титул бұйырмады.