Еуро Лиганың бас жүлдесін «Марсель» мен «Атлетико» сарапқа салады
Австрияның 11 дүркін чемпионы «Зальцбург» Еуро Лиганың қарымта матчында 2:1 есебімен «Марсельден» басым түсті. Бірақ екі кездесудің қорытындысы бойынша мәртебелі турнирдің ақтық додасына берілетін жолдама франциялық футболшыларға бұйырды. Қос клуб арасындағы Марсельде өткен алғашқы кездесуде 2:0 есебімен алаң иелерінің мерейі үстем болған еді. «Атлетико»мен «Арсенал» арасындағы екінші жартылай финалдың нәтижесі, испаниялық клубтың пайдасына шешілді. Сырт алаңда 1:1 есебімен тең ойнап қайтқан «Атлетико» Мадридтегі «Ванда Метрополитано» стадионында өткен екінші матчта 1:0 есебімен жеңіске жетті.
Зальцбургте матчтың бірінші таймында есеп ашылған жоқ. Есесіне кездесудің екінші бөлігі алаң иелерінің шабуылымен басталды. Алдымен жеке басының шеберлігін танытқан Амаду Айдар есеп ашса, көп кешікпей Буна Сарр таблодағы есепті еселей түсті. Теке-тірестегі жалпы есепті теңестіріп үлгерген алаң иелері , бұдан әрі де шабуылды тоқтатқан жоқ және есепті ұлғайтатын мүмкіндіктері де болды. Бірақ матчтың соңғы минуттарында күтпеген жерден гол жберіп алды. Бұл ойын сәтінде осы матчқа әділ-қазылық жасаған ресейлік төрешілер бір емес екі рет қателікке бой бергенін айта кеткен жөн. Ең бастысы «Марселді» финалға алып шыққан шешуші голдың офсайдтан кейін соғылғаны. Бірақ төрешілер бригадасы бұл эпизодқа мән бере қоймады. Сонымен «Зальцбург»соңғы минутта сан соғып қалса, «Марсель» финалға жол тартты.
«Атлетико» мен «Арсенал» арасындағы қарымта матчтың тағдырын жалғыз доп шешіп кетті. Үзіліске шығар алдын өз мүмкіндігін бос жібермеген Диего Коста, өз командасына жеңіспен қатар Еуро Лиганың жолдамасын сыйлады.
Еуро Лиганың шешуші бәсекесі 16 мамыр күні Лионда өтеді.
