Дамир Исмағұловты UFC көріп қалуымыз әбден мүмкін
Осыдан бірнеше күн бұрын қазақ батыры Дамир Исмағұлов, M-1 Challenge 94 турнирінде беларусь Артем Дамковский ұтты. M-1 Challenge жеңіл салмақтағы чемпионына, бұл күндері көптеген промоушендерден ұсыныс түсіп жатқан көрінеді. Әрине, жанкүйерлер қауымы талантты да жігерлі және нағыз ер жігітке тән мінезімен танылған Дамирдей саңлақтың әлемдегі ең айтулы UFC (Абсолютті жауынгерлік чемпионат) лигасымен келісім шартқа отырғанын қалайтыны рас, деп хабарлайды SportX.kz
«Жел тұрмаса шөптің басы қимылдамайды»демекші, М-1 Global аясындағы Артем Дамковскиймен өткен жекпе-жектен кейін, БАҚ көздері Исмағұловтың Мәскеуде өтетін UFC турнирінде өнер көрсететіні жайлы ақпарат таратты. Бұл ақпаратты сарбаздың өзі де растап отыр. Исі қазақ үшін бұл сөз жоқ жағымды жаңалық. UFC төрінде ойнақ салғысы келетін сарбаздар көп. Бірақ аралас жекпе-жек өнерінің «Меккесі» саналатын әлемдегі ең танымал және ең мәртебелі ұйымның құрамына ілігу — барша сарбаздың арманы. Егер күні ертең Дамир бауырымыз осы промоушенде бақ сынап жатса, нұр үстіне нұр болар еді!
Жолы болып жатса Дамир Исмағұлов UFC турнирінде өнер көрсеткен екінші қазақ сарбазы атанғалы отыр.Бұған дейін мұндай құрметке қытайлық қандасымыз Жұмабек Тұрсын қол жеткізген еді. Қалың қытайдың арасынан топ жарып шыққан Жұмабек, аралас жекпе-жектен көптеген ұйымдардың чемпиондық белбеуін беліне таққан азамат. Қытайда 20 астам жекпе-жек өткізген Жұмабек Тұрсын, оның бәрінде жеңіске жетеді. Осындай табыстың нәтижесінде UFC-мен келісімге отырып, беделді ұйымда айқасқан тұңғыш қазақ атанды.
Дамирдің кішкентай кезінен қызыққаны футбол болыпты. Доп қуалап өскен Дамирдің бойында,болашақта жекпе-жек түрлерімен айналыссам деген құлшыныс та болмапты. Не керек 19 жасқа дейін футболмен айналысқан Дамир, бір жолы аяғынан жарақат алып қалады. Аяқ-астынан орын алған оқиға, орынборлық қазақтың өмір жолын күрт өзгертіп жіберді. Содан үзіліс алған Дамирді, достары спорт залына тарта бастайды. Айналып келгенде жекпе-жек өнері, бойында қаны бар мінезді жігіттің серігіне айналады.Аралас-жекпе-жектегі алғашқы қадамын Орал қаласында бастаған Дамирдің шеберлігін шыңдауда, жергілікті жаттықтырушылар Алмат Есентаев пен Армат Сәрсекеновтің сіңірген еңбегі зор.
