Бейбіттің жекпе-жегін сағынып жүргендер көп

Кәсіпқой бокстан әлемнің экс-чемпионы Бейбіт Шүменов (17-2,11), 7- шілде күні Астана төрінде түрік боксшысы Хизни Алтункаеймен (30-1,7) жұдырық түйістіреді. Бейбіт әзірге бүкіл қазақ елі бойынша екі салмақ категориясының  чемпиондық белбеуін  беліне таққан боксшы. Алдағы үлкен бокс кешінде жерлесіміз WBA тұжырымының белбеуі үшін сынға түседі. 

Бейбіттің қарсыласы осал боксшы емес. Мұны  түрік жігітінің шаршы алаңда өткізген жекпе-жектер тізімінен де байқауға болады. Жартылай ауыр және бірінші ауыр салмақ бойынша әлемнің экс- чемпионы Бейбіт Шүменов,  бүгінгі күні Дүниежүзілік Бокс Қауымдастығы (WBA) рейтинг кестесінде екінші орында тұр.

Әуесқой бокста едәуір табысқа қол жеткізген Шуменов, Афиныдағы  олимпиада шаршы алаңында бақ сынаған былғары қолғап шебері. 34 жастағы жерлесіміз 2017 жылдың қаңтарында денсаулығына байланысты бокспен қош айтысқан еді.Араға уақыт салып  үлкен додаға қайта қосылған әйгілі боксшыға жолың болсын дейміз!