Арман октагонға қашан шығады?
Қазақстандағы ең танымал сарбаз Арман Оспановтың жекпе-жегін сағынып жүргендер өте көп. Көптің көзінен таса қалған Арман, ұзаққа созылған үзілістен кейінгі алғашқы бәсекесін алдағы қараша айында өткізеді, деп хабарлайды SportX.kz.
Бұл жаңалықты Alash Pride клубының директоры Данияр Қасқараев мырзаның өзінен естідік. Арманның октагондағы жекпе-жегін ресейлік ACB промоушені аясындағы ірі турнирлердің бірінен көретін боламыз. Жарыстың қашан, қай жерде өтетіні және жерлесіміздің кіммен кездесетіні жайлы ақпараттар әзірге жоқ.
Әскери самбодан әлемнің бірнеше дүркін чемпионы Арман Оспановтың жолын тосқан көрермен,сүйікті спортшысынан қашанда үлкен нәтиже күтеді. Басқа спорт туралы әңгіме басқа, ал соңғы жылдары аралас жекпе-жектің ортасында жүрген жігіттердің ізін бағып, олар жайлы жылт еткен жаңалықтың шеті шыға қалса, жабылып талқыға салатын орта пайда болды. Мұндай құбылыс әрбір қазақтың жекпе-жек спортына деген зор ықыласын және қанымызға біткен өнер екенін білдірсе керек. Бүкіл Ресейді шулатып жүрген орынборлық қандасымыз Дамир Исмағұловтың жеңістерін тамашалаған әрбір қазақ, бір жасап қалады. Өзіміздің Ермек Тлауов, Әділ Боранбаев, Қайрат Ахметов, Қуат Хамитов, Асұлан Тоқтарбаев, Ержан Естанов және алысқа шабуға дайын жүрген Шавкат Рахманов, Арман Оспанов, Жалғас Жұмабаев, Арман Әшімов, Бейбіт Назаров, Ерлан Тілеумбетов тағы басқаларының жолына үнемі үлкен үмітпен қарайтынымыз рас. Арман Оспанов пен Арман Әшімов алғаш рет жеңілгенде, көңіл-күй бұзылып, жабырқаған тұста іштей олардың октагонға ертерек оралып, қарымта қайтарғанын тіледік. Бауырларымыздың жеңілмегенін қалаймыз және үнемі жеңе берсе екен дейміз. Нағыз жанкүйерлер осындай болады.
Оспанов өзінің соңғы жекпе-жегін 2017-жылдың 17-желтоқсанында өткізді. Мәскеудегі бәсекеде әділ-қазылар алқасы жерлесіміздің қолында тұрған жеңісті көпе-көрнеу, оның қарсыласы ресейлік Алексей Полпудниковқа ұстатып жібергені есімізде. Төрешілер шешіміне басқа емес Алексейдің өзі таң қалған. Үстіміздегі жылдың 5- мамырында Ленгер қаласының тумасы АСВ аясындағы кезекті турнирде Акоп Степанянмен күш байқасатын болған. Бірақ кездесуге бары-жоғы он минут қалғанда Степанян белгісіз себептермен жекпе-жектен бас тартты.
