Арландардың өнерін атыраулықтар тамашалайды

Бүгін Атырауда үлкен бокс кеші өтеді.  Еуропа мен Азияны бөліп жатқан еліміздің батысындағы әсем қала төрінде » Астана арландары» мен «British Lionhearts» WSB аясындағы екінші жартылай финалдық кездесулерін  өткізеді. Матчтық кездесу алдында  әдеттегідей рингке шығатын боксшылардың  салмақ өлшеу рәсімі өтті , деп хабарлайды SportX.kz.

Бүкіләлемдік бокс сериясы аясындағы  алғашқы бәсекеде біздің жерлестеріміз сырт алаңда ағылшын боксшыларын 3:2 есебімен жеңіп кеткен еді.  Атыраудағы бүгінгі тартыс  мәртебелі жарыстың ақтық сынына  берілетін жолдаманың иегерін анықтап беретін болады. Турнир регламенті бойынша  шаршы алаң  төрінде бес  боксшылар жұбы күш байқасады. Егер екі кездесудің нәтижесі бойынша ұпай саны теңесіп жатса, онда  қосымша тағы бір кездесу өткізіледі.

Матч Астана уақыты бойынша сағат 17:30 басталады.