Аралас жекпе-жектен ең күштіміз — Жалғас Жұмағұлов
Халықаралық fightmatrix порталы аралас жекпе-жек бойынша 2018 жылдың маусым айына дейінгі ең үздік сарбаздардың рейтинг кестесін тізіпті. Сегізбұрышты темір тор ішінде айдарынан жел ескен сарбаздар көшін UFC (Абсолютті жауынгерлік чемпионат) лигасының аса жеңіл салмақтағы чемпионы және осы атағын он бір мәрте сәтті қорғаған америкалық Деметриус Джонсон бастапты, деп хабарлайды SportX.kz.
Жалпы fightmatrix.com порталы рейтинг құрғанда ММА сарбаздарына қатысты мәліметтерді кеңірек қамтуға ерекше мән береді. Бүгінгі күні порталдың рейтинг кестесінде тоғыз салмақ дәрежесі бойынша 3325 сарбаз тіркелген. Оның ішінде әр салмақ категориясындағы сарбаздар саны 25 тен 60 шейін жетеді.
Сонымен жаңа тізімде Деметриус Джонсон ешкімге дес бермей тұрса, оның отандастары жеңіл салмақтағы Макс Холлоуэй (19-3-0) — 290 ұпаймен екінші, ал UFC ауыр салмақтағы чемпионы Стипе Миочич(18-2-0) — 289 баллмен үздік үштікті түйіндепті.
Өзіміздің сайыпқырандарға тоқталсақ, ең көп ұпай жинаған Жалғас Жұмағұлов болыпты. «Жако» деген лақап атымен танылған аса жеңіл салмақтағы мықтымыз 93 ұпай еншілеп, өз категориясында 24 сатыдан табылған.
Жұмағұлов ресейлік Fight Night Global ұйымының рейтинг кестесінде бірінші орынға жайғасқан. Және осы ұйым чемпионы дағыстандық Тагир Ұланбековке тиесілі белбеуден бірден-бір үміткер.
Fightmatrix версиясы бойынша қазақстандық үздік»ондықпен» таныс болыңыздар:
- Жалғас Жұмагулов (11-3-0) – 93 ұпай
- Георгий Кичигин (18-5-0) – 76
- Шавкат Рахмонов (8-0-0) – 62
- Игорь Свирид (10-6-0) – 62
- Умар Янковский (12-1-0) – 51
- Арман Оспанов (8-2-0) – 49
- Сергей Морозов (11-4) – 47
- Николай Веретенников (6-3-0) – 46
- Фаниль Рафиков (11-1-0) – 44
- Асылжан Бахытжанұлы (7-1-1) – 43
