Әлемдегі ең қымбат футболшы кім?

CIES Football Observatory версиясы бойынша «Тоттенхэм» сапындағы Англия ұлттық құрамасының футболшысы Харри Кейн, әлемдегі ең  қымбат футболшы ретінде танылды, деп хабарлайды. SportX.kz.

CIES Football Observatory жыл сайын футбол жұлдыздарының құнына қатысты зерттеулер жүргізіп отырады.Биылғы зерттеулердің нәтижесі бойынша ағылшын футболшысы Харри Кейн, есімдері күллі әлемге танымал футбол баһадүрлері Месси, Роналду, Неймар, Гризманн, Салах және басқаларын жарты жолда қалдырыпты.

Аналитиктер футболшылардың құнын бағалауда эксклюзивті алгоритмді пайдаланады.Бұл жерде футболшының жасы,алаңдағы позициясы,клуб пен ұлттық құрамадағы ойыны мен ондағы жетістіктері һәм чемпионаттың  деңгейі ескеріледі.

Ең қымбат футболшы атанған Кейннің трансферлік құны 201 млн евроға бағаланған.Екінші және үшінші орындарды «Пари Сен-Жермен» саңлақтары бразилиялық Неймар (195,7) мен француз  Киллиан Мбаппе (186,5) бөлісті.

Үздік ондыққа кіргендердің арасында Лионель Месси (184,2 миллион евро), Мохаммед Салах  (171,3), Деле Алли (171), Кевин де Брюйне (167,2), Антуан Гризманн (164,5), Паоло Дибала (164,2) және Ромелу Лукаку бар.

Осы рейтинг кестеде 24- орыннан табылған «Реалдың» лидері Криштиану Роналдудың трансферлік құны 103,4 млн евроны құрапты.