ӘЧ-2018: Ресейдің намысын жыртатын 23 футболшы дайын

Футболдан Ресей ұлттық құрамасының жаттықтырушылар штабы әлем чемпионатында өнер көрсететін 23 футболшының есімін жария етті, деп хабарлайды SportX.kz.  

Әлем чемпионатын қабылдау құрметіне ие болған Ресей құрамасы үшін өз еліндегі футбол додасы оңай тимейтіні анық. Өз отандастары алдында өнер көрсету, бұрын-соңды оза шауып бәйге алып жүрмеген ұлттық құрама үшін қиынның-қиыны.Үлкен жауапкершілікпен қатар жан-жақтан көрсетілетін қысымды айтыңыз, не керек Станислав Черчесов пен оның командасына бәріне көнуге тура келеді.Бас жаттықтырушы мен оның кеңесшілері  өздері сенім артқан футболшыларды тағы бір електен өткізіп, олардың мүмкіндіктерін зерттей келе мундиальға түсетін 23 футболшыны іріктеп алыпты.

Сонымен команданың ең соңғы қорытынды құрамына мына футболшылар еніпті:

Қақпашылар: Игорь Акинфеев (ЦСКА), Владимир Габулов («Брюгге»), Андрей Лунев («Зенит»).

Қорғаушылар:  Сергей Игнашевич, Марио Фернандес (екеуіде – ЦСКА) Владимир Гранат, Федор Кудряшов (екеуіде – «Рубин»), Андрей Семенов («Ахмат»), Игорь Смольников («Зенит»), Илья Кутепов («Спартак»).

Жартылай қорғаушылар: Александр Ерохин, Юрий Жирков, Далер Кузяев (бәрі – «Зенит»), Александр Головин, Алан Дзагоев (екеуіде – ЦСКА), Роман Зобнин, Александр Самедов (екеуіде – «Спартак»), Юрий Газинский («Краснодар»), Антон Миранчук («Локомотив»), Денис Черышев («Вильярреал»).

Шабуылшылар: Артем Дзюба («Арсенал» Тула), Алексей Миранчук («Локомотив»), Федор Смолов («Краснодар»).

Мұның алдындағы кеңейтілген құрама сапына шақырылған Константин Рауш, Александр Ташаев (екеуіде— «Динамо»), Сослан Джанаев («Рубин»), Роман Нойштедтер («Фенербахче») және Федор Чалов (ЦСКА) қорытынды құрамадан тыс қалыпты.